अशी आहे ग्रहस्थिती – राहू-हर्षल मेषेत, मंगळ वृषभेत, शुक्र-रवि सिंहेत, बुध कन्या राशीत, केतू तुळेत, शनि (वक्री)-प्लूटो (वक्री) मकरेत, गुरू (वक्री)-नेपच्युन (वक्री) कुंभेत, चंद्र वृश्चिकेत, त्यानंतर धनु, मकर राशीत. सप्ताहाच्या अखेरीस कुंभेत.
दिनविशेष – ६ सप्टेंबर रोजी परिवर्तिनी स्मार्त एकादशी, ७ सप्टेंबर रोजी भागवत एकादशी, ९ सप्टेंबर रोजी अनंत चतुर्दशी.
मेष – प्रेमप्रकरणात यश मिळेल. मंगळाचा सप्तमेश शुक्राबरोबर केंद्रयोग. मघा नक्षत्रातील शुक्र पंचमात रविबरोबर त्यामुळे निर्णय अचूक ठरतील. कार्यक्षेत्रात चांगले यश मिळालेले दिसेल. व्यापारात, सरकारदरबारी अडकलेली कामे मार्गी लागतील. आर्थिक स्थिती उत्तम राहील. एखाद्या कामाचे चोख नियोजन केल्याबद्दल कौतुक होईल. संततीस यश मिळेल. स्पर्धा, मनोरंजनाच्या कार्यक्रमातून आर्थिक प्राप्ती होईल. लग्नी राहू सप्तमात, केतू-शुक्र मघा नक्षत्रात त्यामुळे जोडीदाराबरोबर वाद होतील.
वृषभ – उत्साह वाढेल. शुक्राचे सिंहेतील राश्यांतर, लग्नी मंगळ, शुक्र-मंगळ-रवि केंद्रयोग यामुळे टापटीप राहाल. खेळ, कला, गायन क्षेत्रातील मंडळींना चांगला काळ आहे. साहसी अनुभव येईल. संततीसाठी शुभघटनांची नांदी देणारा काळ आहे. शिक्षणात यशस्वी वाटचाल राहील. वक्तृत्व, संभाषणकला, पत्रकारिता, साहित्य क्षेत्रातील मंडळी आघाडीवर रहातील. आर्थिक लाभ वाढतील.
मिथुन – प्रवासाचे योग जुळून येतील. बुधाचे सुखस्थानातील भ्रमण, गुरुदृष्टी त्यामुळे चांगले अनुभव येतील. लाभेश मंगळाचे व्ययातील भ्रमण खर्च वाढवेल. कुंडलीत मंगळ व्यय भावात असल्यास आरोग्याची काळजी घ्या. मंगळाची सप्तमदृष्टी षष्ठम भावावर राहील, त्यामुळे उच्च रक्तदाब, अपघात, पेशी वाढणे-कमी होणे अशा समस्या निर्माण होतील. मघा नक्षत्रातील शुक्र वैवाहिक जोडीदाराबरोबर वितुष्ट निर्माण करेल. व्यवसायात अपेक्षित बदल दिसणार नाहीत. त्यामुळे वेट अँड वॉचची भूमिका ठेवा.
कर्क – तीन ते पाच सप्टेंबर हा काळ विशेष लाभदायक ठरणार आहेत. शेअर, सट्टा, लॉटरी, जमिनीचे व्यवहार यातून चांगले लाभ होतील. नवी खरेदी होईल. नोकरीत बदली पथ्यावर पडेल. परदेशप्रवासाचे योग जुळून येतील. खेळाडू मैदान गाजवतील. पदकाची कमाई कराल. दशमातील राहूमुळे अधिकारप्राप्ती होईल. कामाच्या ठिकाणी वर्चस्व दाखवाल, कौतुक होईल. वाहन खरेदीचा योग आहे. पैसे बेताने खर्च करा.
सिंह – सरकारी सेवेत, खासकरून पोलिस दल, लष्करात उच्चपदस्थांना येणारा काळ उत्तम राहील. रवी स्वराशीत, मंगळ दशमभावात असल्याने अनपेक्षित आर्थिक लाभ मिळतील. नव्या वास्तूचा प्रश्न मार्गी लागेल. महिलांना आरोग्य प्रश्न निर्माण होतील. वादाचे प्रसंग टाळा. पेन्शन, विमा, यातून चांगले लाभ होतील. रवि-शुक्र युतीमुळे फोटोग्राफी, अभिनय, नृत्य, चित्रकला जोपासणार्‍यांना शुभफळ मिळेल.
कन्या – संमिश्र घटनांचा काळ आहे. शिक्षकांसाठी उत्तम काळ राहील. बुद्धिवादी मंडळींसाठी उत्तम काळ आहे. सामाजिक कामासाठी वेळ खर्च कराल. त्यातून प्रसिद्धी मिळेल. घरात धार्मिक कार्य घडेल. प्रेम प्रकरणासाठी चांगला काळ आहे. यशप्राप्तीचा आठवडा. संधी साधून कर्तबगारी दाखवण्याचा काळ आहे.
तूळ – चांगले लाभ मिळतील. खासकरून सौन्दर्य प्रसाधने, कापड व्यवसाय, शेती उद्योग यात काम करणार्‍यांना धनप्राप्तीचे योग आहेत. रविबरोबर शुक्राची युती झाल्याने सरकारी नोकरांना बदलीचा लाभ मिळेल. नोकरीत बढती मिळून मोठे पद मिळेल. व्यावसायिकांना मनाविरुद्ध घटनांचा सामना करावा लागेल. महत्वाच्या कामात दिरंगाई होईल. प्रवासात अनपेक्षित खर्च वाढेल. चिडचिड होईल. धार्मिक कार्यात पुढाकार घ्याल. वक्री शनि आणि वक्री प्लुटोमुळे घरात अशांतता निर्माण होईल.
वृश्चिक – सामाजिक क्षेत्रात, नोकरीत ठसा उमटवण्यासाठी उत्तम काळ आहे. वैवाहिक जोडीदाराबरोबर चांगले जमेल. व्यवसायवृद्धीसाठी परिश्रम घ्या. राजकारण्यांना ताकद दाखवण्यासाठी चांगला काळ आहे. नव्या ओळखी होतील. नातेवाईकांकडून आर्थिक मदत मिळेल. बोलण्यावर नियंत्रण ठेवा, अन्यथा नुकसान होईल. व्यापारात चांगला नफा मिळेल. लेखन, प्रकाशन व्यवसायात चांगला काळ आहे. शनि-मंगळ-बुध नवपंचम योग बांधकाम व्यावसायिकांसाठी चांगला आहे.
धनु – वकील, विमा एजंट, पुस्तकाचे दुकानदार, छापखाना, शिक्षक यांच्यासाठी चांगला काळ राहील. रवीसोबत शुक्र असल्याने वारसाहक्काचा लाभ मिळेल. वडिलांकडून आर्थिक मदत मिळेल. उच्चपदावरच्या अधिकार्‍यांना मनासारखे पोस्टिंग मिळेल. राजकीय क्षेत्रात मनासारखे पद मिळेल. व्यवसायात चांगली वृद्धी होईल. कौटुंबिक वातावरण उत्तम राहील. पत्नीसाठी महागडा दागिना, वस्त्र खरेदी कराल.
मकर – आठवड्याच्या सुरुवातीला नातेवाइकांकडून अनपेक्षित लाभ मिळतील. अभियांत्रिकी, आयटी क्षेत्रात नवीन कामाच्या ऑर्डर मिळतील. लेखापरीक्षकांचा व्याप वाढेल. नोकरीत नव्या प्रोजेक्टवर काम करावे लागेल. गरोदर महिलांनी काळजी घ्यावी. खेळाडूंसाठी चांगला काळ आहे. संततीशी वादाचे प्रसंग निर्माण होऊ शकतात.
कुंभ – साडेसाती सुरू आहे. आर्थिक अडचण निर्माण होऊ शकते. मानसिक स्थिती बिघडेल. पैसे खर्च होतील. व्यभिचारी वृत्तीपासून लांबच राहा. नोकरी-व्यवसायात महिलांचा मान ठेवा. दाम्पत्यजीवनात कुरबुरीचा काळ आहे. उच्चशिक्षणात अडचणी येतील. जमीनजुमल्याचे व्यवहार होतील. शेतकरी, बांधकाम व्यावसायिकांना चांगला काळ आहे.
मीन – आरोग्याच्या दृष्टीने कटकटीचा काळ आहे. समाजसेवकांसाठी चांगला काळ राहील. जुन्या मित्रांची भेट होईल. सरकारी, कोर्टकचेरीच्या कामात यश मिळेल. व्यापारात लाभ होतील. कानाचे दुखणे उद्भवू शकते. प्रवासात प्रकृती सांभाळा. बाहेरचे खाणे टाळा. नव्या ओळखी होतील, त्यांचा भविष्यात चांगला फायदा होऊ शकतो.