पोलीस व लष्करा कडुन हवेत बंदुकीच्या फैरी झाडून,अखेरच्या मानवंदनेनंतर शासकीय इतमामात करवीर तालुक्याचे सुपुत्र शहीद जवान संग्राम शिवाजी पाटील यांच्या पार्थिवावर सोमवारी निगवे, खालसा गावात अत्यंत भावपूर्ण वातावरणात अंत्यसंस्कार करण्यात आले.
शस्त्रसंधीचे उल्लंघन करणाऱ्या पाकिस्तानकडून सीमेवर जम्मु-काश्मीर येथे हिंदुस्थानच्या सैन्यावर गोळीबार सुरुच आहे. शनिवारी रात्री राजौरी जिल्ह्यातील नौशेरा सेक्टर येथे पाकिस्तान सैन्याच्या हल्ल्यात निगवे, खालसा, ता.करवीरचे सुपुत्र आणि 16 मराठा बटालियनचे जवान हवालदार संग्राम शिवाजी पाटील हे शहीद झाले.
गावचा सुपुत्र देशाच्या रक्षणार्थ शहीद झाल्याची बातमी समजताच निगवे खालसा गावासह पंचक्रोशीत शोककळा पसरली होती. कुटुंबाचा एकूलता एक मुलगा सीमेवर शहीद झाल्याने कुटुंबीयांवर दुखाचा डोंगर कोसळला होता. तर गेल्याच आठवड्यात ऐन दिवाळीच्या पुर्वसंध्येला बहिरेवाडी,ता.आजरा येथील अवघ्या 20 वर्षाचे जवान ऋषिकेश जोंधळे हे जम्मु काश्मीर येथे पाकिस्तान सैन्याशी लढताना शहीद झाले होते. दुसऱ्याच आठवड्यात जिल्ह्यातील आणखी एक सुपुत्र शहीद झाल्याने, संपूर्ण जिल्ह्यात पाकिस्तान विरोधात संतापाची लाट उसळली होती.
शहीद जवान संग्राम पाटील यांचे पार्थिव सोमवारी सकाळी 6.30 च्या सुमारास कोल्हापूरहून निगवे खालसाकडे दाखल होत असताना, मार्गावरील गावांनी रस्त्याच्या दुर्तफा रांगोळी काढून, ठिकठिकाणी श्रध्दांजलीचे फलक लावून तसेच ग्रामस्थांकडून पुष्पे वाहून आदरांजली वाहण्यात येत होती. निगवे खालसा येथील घरी पार्थिव काही काळ अंतिम दर्शनासाठी ठेवण्यात आले. येथे कुटुंबीय आणि नातेवाईकांनी दर्शन घेतले. कुटुंबीयांच्या आक्रोशाने उपस्थितांचे डोळे पाणावले होते. यानंतर सजवलेल्या वाहनातून अंत्ययात्रा काढण्यात आली.
रस्त्याच्या दुतर्फा रांगोळी काढण्यात आली होती.चौका-चौकात फलक लावून आदरांजली वाहण्यात येत होती. ग्रामस्थ, विद्यार्थी-विद्यार्थिनी पुष्पहार आणि फूले वाहून आदरांजली वाहत होते. “अमर रहे अमर रहे संग्राम पाटील अमर रहे, भारत माता की जय, वंदे मातरम,पाकिस्तान मुर्दाबाद” अशा घोषणा देत ही अंत्ययात्रा अंत्यसंस्काराच्या ठिकाणी आली.
यावेळी श्रीमंत छत्रपती शाहू महाराज, पालकमंत्री तथा माजी सैनिक कल्याण राज्यमंत्री सतेज पाटील, खासदार संजय मंडलीक, आमदार प्रकाश आबिटकर, आमदार ऋतुराज पाटील, आमदार चंद्रकांत जाधव, आमदार पी.एन.पाटील, जिल्हा परिषद अध्यक्ष बजरंग पाटील, जिल्हाधिकारी दौलत देसाई, मुख्य कार्य. अधिकारी अमन मित्तल, पोलीस अधीक्षक शैलेश बलकवडे, सरपंच पांडुरंग महाडेश्वर आदी लोकप्रतिनिधींनी पुष्पचक्र वाहून मानवंदना दिली.
सैन्य दलाच्यावतीने सुभेदार मेजर भाऊ तांबे, शहीद जवानाचे वडील शिवाजी पाटील, बंधू संदीप, कर्नल शिवाजी बाबर, शिवाजी पवार, कर्नल विजय गायकवाड, सुभेदार संतोष कोकणे, सुभेदार अनिल देसाई, सुभेदार जयसिंग देशमुख, सुभेदार सीताराम दळवी, सुभेदार नारायण नरवडे, कर्नल डी.एस.नागेश आणि आजी माजी सैनिक संघटच्यावतीनेही पुष्पचक्र वाहून आदरांजली वाहण्यात आली.
यानंतर पोलिसांच्या आणि लष्कराच्या आठ जवानांच्या तुकडीने बंदुकीच्या हवेत 3 फैरी झाडून तसेच अंतिम बिगुल वाजवून शहीद जवान संग्राम पाटील यांना अखेरची मानवंदना दिली. शहीद जवान संग्राम पाटील यांचा मुलगा शौर्यकडून पार्थिवाला अग्नी देऊन अंत्यसंस्कार करण्यात आले.
