तुमच्या फोनवर कोणाची पाळत नाही ना, याची खात्री करून घेतली आहेत ना तुम्ही? आजकाल काही भरवसा नाही.
– प्रीतेश अत्रे, डोंबिवली
मला त्याची काडीचीही भिती नाही. एकतर मौज मस्ती, निंदा याची ऐकणार्‍यांना चटक तरी लागेल किंवा कलाकारांच्या व्यथा समजल्यावर परत फिरकायचं त्यांचं धाडसच व्हायचं नाही.
‘मेरी फिल्म में आप काम करना चाहोगे?’ असा मेसेज तुम्हाला राज कुंद्राकडून आला तर काय कराल?
– अभिषेक साळवी, चेंबूर
गेल्या दीड वर्षात मी एकही दिवस शूट केलं नसलं तरी या अडीअडचणीत माझं एकूण उत्तम चाललेलं आहे आयुष्यात.
या देशात हुकूमशाहीला पर्याय नाही, असं लोकशाही मार्गांनी निवडून आलेल्या अनेकांना वाटायला लागतं निवडून आल्यानंतर… तुमचं मत काय?
– गणेश शिंदे, धनकवडी, पुणे
देशाला स्वातंत्र्य मिळाल्यावर आपल्या जनतेला शिस्त लावण्यासाठी पहिली दहा वर्ष हुकूमशाही असायला हवी; असं एका खूप मोठ्या नेत्यानं जाहीर विधान मांडलं होतं. ते झालं नाही पण नंतर पुढे प्रत्येकवेळी सत्तेत असलेल्यांना तरी असं वाटत आलंय किंवा ही हुकूमशाहीच आहे असं विरोधकांना तरी वाटत आलेलं आहे.
बाई आणि बाटली यांची सांगड ज्याने कुणी घातली ती का बरं घातली असेल?
– विद्याधर संवत्सरकर, दादर
प्रेमातलं यश किंवा वैफल्य अवाजवी झालं की, या दोघीना एकमेकींशिवाय त्यांना करमत नाही. क्रम काहीही असो.
माझे दोन प्रश्न आहेत…
१. पावसाळा आला की मराठी मनांना ‘गारवा’ची आठवण होतेच… या आल्बममधलं तुमचं आवडतं गाणं किंवा कविता कोणती?
२. हिंदी सिनेमांमध्येही अनेक पावसाळी गीतं चित्रित झाली आहेत. त्यातलं तुमचं आवडतं गाणं कोणतं?
– श्रद्धा भोंडवे, सांगली
१. ‘गारवा’मधली आवडती कविता ‘बघ तुला माझी आठवण येते का?’ आणि बहुतांशी सगळीच गाणी आवडतात.
२. हिंदी सिनेमातली आवडती पावसाळागीतं खूप आहेत. मधुबालाचं ‘एक लडकी भिगी भागी सी’; नर्गिस यांचं ‘प्यार हुआ इकरार हुआ’; ‘बरसात में हम से मिले तुम’; अमिताभ बच्चन मौसमी चॅटर्जी यांचं ‘रिमझिम गिरे सावन’; स्मिता पाटील, ‘आज रपट जाये’; सरफरोश ‘जो हाल दिल का’ अशी पाच पन्नास अनेक.
शाकाहारी मंडळीही जीवहत्या करतातच. जिवंत भाज्या उकडून, परतून खातात. तरीही त्यांच्यात श्रेष्ठत्त्वाचा दर्प कुठून येत असेल?
– बबन नेवरे, नागपूर
भाजीपाला आणि प्राणी यातला एक महत्वाचा फरक असा आहे की माणूस त्याच्या इच्छेनं शेती स्वत: निर्माण करत असतो. पण तो स्वत: प्राण्यांना जन्म देत नसतो. प्राण्यांचं त्यांचं त्यांचं या निसर्गात असण्याचं स्वतंत्र काहीतरी प्रयोजन आहे. माणसांच्या पोटात जाणे एवढंच त्यांचं नैसर्गिक जीवितकार्य नाही. त्यांचं भक्षण करण्याव्यतिरिक्तही माणूस जिवंत राहू शकतो.
सगळीकडे टॅलेंट हंट कार्यक्रम इतक्या प्रमाणात बोकाळले आहेत, इतकं टॅलेंट खरोखरच आहे सगळीकडे की गंदा है पर धंदा है ये?
– मैथिली गावडे, वसई
प्रसिद्ध सगळ्यांनाच व्हायचं असतं. भले ती तात्कालिक असेल. ‘जेमतेम’ एवढ्याच क्वालिफिकेशनवरही ते शक्य असतं. त्याचा टॅलेण्टशी सम्बन्ध असायलाच हवा असं काही नसतं. प्रसिद्धी मिळवायची असेल तर तुम्हीही संधी सोडणार नाही.
या वर्षीचा पावसाचा भयंकर तडाखा पाहिल्यानंतर तरी लोक यापुढे हवामान बदलांना गांभीर्याने घेऊ लागतील असे वाटते का?
– प्रणय दरेकर, भायंदर
पाऊस एवढाच पडत आलाय नेहमी. पण गेल्या दोन दशकांपासून आपली दाणादाण उडत चालली आहे याची कोणतीही कारणं आपल्याला तपासून घ्यायचीच नाहीयेत, असं एकदा ठरवून टाकलेलं असल्याने गेली अनेक वर्ष आपण फक्त हेच म्हणत आलोय. यावरून घ्या समजून.
डोळे कशासाठी, तुला साठवून मिटून घेण्यासाठी, असं अरूण दाते म्हणतात; डोळे कशासाठी, मारण्यासाठी, असं शिरीष कणेकर म्हणतात, डोळे कशासाठी, या प्रश्नाचं तुमचं उत्तर काय?
– रिझवान शेख, बदलापूर
आजच्या काळात अनेक अनावश्यक गोष्टी टाळण्यासाठी मिटून घेण्यासाठी.
तुमचा सगळ्यात नावडता नट कोणता? नावडती नटी?
– सोनिया घोटगाळकर, कोल्हापूर
अहो या यादीसाठी इथे एवढी जागाच नाही.
