शिक्षणमंत्री केसरकर
पाठ्यपुस्तकांइतकेच आमच्या
डोक्यामध्ये कोरी पाने
हलके झाले बघा आता
आमच्यासारखे त्यांचे जगणे
हव्या कशाला जाडजूड वह्या
दप्तराचे फुकट ओझे
आम्ही वाकतो तुमच्यासारखे
दिल्लीपुढे घेऊन बोजे
आमच्या मनात आहे विचार
करूया आपण शिक्षणक्रांती
हवी कशाला वह्या-पुस्तके
भक्त बनूया मिळेल मुक्ती
—– —– —–
मुख्यमंत्री शिंदे
एकदाच काय तो होऊं द्या फैसला
करूनच टाका सोक्षमोक्ष
जनतेने हाकलून देण्यापेक्षा
करून टाका कपाळमोक्ष
आणावे किती उसने अवसान
किती करावी नाटकबाजी
आता पुरा थकून गेलो
आजूबाजूला आहेत पाजी
बस झाले मुख्यमंत्रीपद
पुरी हौस फिटली आता
खाल्ले ते खवखवे सारखे
झोप उडाली अपचन होता
—– —– —–
उपमुख्यमंत्री फडणवीस
त्यांच्याखाली आमचं पद
किती व्हावं अवमूल्यन
किती सहन करावं बोला
किती काळ मी राहू दुल्हन
अति झालं आणि हसू आलं
सीएमची एकेक पाहून सर्कस
प्रॉम्प्टिंगवाचून त्यांचं नाटक
सरकत नाही होतं ओंफस
काय करावं पामराने म्या
सीएम पदाची पडती स्वप्ने
मोदी-शहाही म्हणत नाहीत
कुछ तो कर ले मेरे अपने
—– —– —–
पंतप्रधान मोदी
जगात मिळतो इतका सन्मान
इथली जनता नाही विचारत
घर की रोटी डाल बराबर
कशी करू मी तिची मरम्मत
किती विकास केला आम्ही
तिकडे कोणी पाहातच नाही
महागाईला जाऊं दे खड्ड्यात
यांना स्वस्ताईची घाई
बघा बघा हे उंच टॉवर्स
जनतेची ही उगाच कटकट
जिकडे तिकडे मेट्रो बुलेट
का ऐकावी उगाच वटवट
—– —– —–
अमित शहा
बघा जिंकली इशान्य राज्ये
कसब्यामध्ये बसला फटका
लागून शिंद्यांच्या नादाला
महाराष्ट्रातही मिळेल झटका
भीती वाटते तरीही मजला
निवडणुकीच्या मारून गमजा
वारे फिरतील म्हणती सगळे
तुम्ही मनातच काय ते समजा
अपशकुनी चोरांच्या नादी
लागताच मज वाटे शंका
जनता रूसली तर मग बोंबला
जाळून टाकेल आपली लंका