अभिनेता धैर्य घोलप याने गेल्याच वर्षी ‘तानाजी’ या सिनेमातून पदार्पण केले होते. सिनेमाचा खलनायक उदयभान सिंह (सैफ अली खान) याच्या हातून धैर्य घोलपने साकारलेल्या मावळ्याचा मृत्यू होताना दाखवला आहे. हाच अभिनेता धैर्य घोलप आता कलर्सच्या ‘बावरा दिल’ या नव्या मालिकेत ‘सरकार’ या प्रमुख खलनायकाच्या भूमिकेतून टीव्ही मालिकेत पाऊल ठेवतोय.
विशेष म्हणजे ‘तानाजी’मधल्या सैफ अली खान यांच्या निर्दयी उदयभान सिंह या भूमिकेकडून ‘सरकार’ या खलनायकी पात्रासाठी प्रेरणा घेतल्याचे धैर्य सांगतो. तो पुढे म्हणतो, मला नेहमीच नकारात्मक पात्रांबद्दल आकर्षण वाटत आलंय. कारण खलनायकी भूमिकांमध्ये भावनांच्या अनेक छटा साकारायला मिळतात. आपल्यातल्या अभिनेत्याचा त्यामुळे कस लागतो. उदयभान ही भूमिका ओम राऊत सरांच्या मार्गदर्शनाखाली सैफ सर कशी साकारत होते हे मी पाहिले. सैफ सरांना भूमिकेशी मग्न होताना, त्यांची तयारी बारकाईने न्याहाळायची संधी मला मिळाली. त्याचा फायदा ‘सरकार’ ही भुमिका रंगवताना होत आहे, असेही त्याने स्पष्ट केले.
