एटीएम सेंटरमध्ये पैसे काढण्यासाठी गेलेल्या व्यक्तीला मदत करण्याच्या बहाण्याने चोरट्याने एटीएम कार्ड बदली करून 74 हजार रूपये काढून घेतले आहेत. टिंबर मार्केट परिसरातील एटीएम सेंटरमध्ये घटना घडली आहे. याप्रकरणी जयपालराम रामदेवजी काला (रा. टिळेकरनगर, कोंढवा) यांनी तक्रार दिली आहे.
तक्रारदार रामदेवजी 20 जानेवारीला टिंबर मार्केट येथील एका बँकेच्या एटीएम सेंटरवर पैसे काढण्यासाठी गेले होते. त्यांनी पैसे काढण्याचा प्रयत्न केला. पण, पैसे निघाले नाही. त्यांच्या पाठीमागे असलेल्या चोरट्याने त्यांना पैसे काढण्यास मदत करण्याचा बहाणा केला. त्यांच्याकडून एटीएम कार्ड घेत पीन क्रमांक विचारून घेतला. तो पीन क्रमांक टाकला. पण, पैसे निघाले नाहीत. त्याने एटीएम कार्ड काढून त्यांचे कार्ड ऐवजी दुसरेच त्यांना एटीएम कार्ड दिले. तक्रारदार यांनी एटीएम कार्ड घेऊन निघून गेले. त्यानंतर आरोपीने त्यांच्या एटीएम कार्डचा वापर करून 74 हजार रूपये काढून घेत फसवणूक केली. पैसे कमी झाल्याचा मेसेज आल्यानंतर रामदेवजी यांना खात्यातून पैसे काढल्याचे समजले. त्यानंतर त्यांनी सायबर पोलीस ठाण्यात तक्रार दिली आहे.
सुरक्षारक्षक नसलेल्या एटीएम सेंटर चोरट्यांच्या रडारवर
एटीएम सेंटरवर पैसे काढण्यासाठी गेलेल्या नागरिकांना मदतीच्या बहाण्याने चोरट्यांकडून एटीएम कार्ड बदली केले जाते. त्यानंतर पैसे काढले जात असल्याच्या घटना घडल्या आहेत. एटीएम सेंटरवर सुरक्षारक्षक नसलेल्या ठिकाणीच थांबून चोरटे असे गुन्हे करत असल्याचे उघडकीस आले आहे. त्यामुळे नागरिकांनी पैसे काढण्यासाठी मदत घेताना काळजी घ्यावी. तसेच, पीन क्रमांक कोणालाही सांगू नये, असे अवाहन सायबर पोलिसांकडून करण्यात आले आहे.
