कायदे परत घ्या, नाहीतर तुमचे सिंहासन परत घेऊ! शेतकऱ्यांचा मोदी सरकारला इशारा

लालकिल्ल्यावर गेलेले शेतकरी नव्हतेच

गेली 35 वर्षे शेतकऱयांच्या हितासाठी आंदोलन करीत आहे. संसदेला घेराव घालण्याचा इशारा दिला असेल परंतु लाल किल्ल्यावर जाण्याची भाषा आजवर कधीही केलेली नाही. 26 जानेवारीला जे लोक लालकिल्ल्यावर गेले ते शेतकरी नव्हतेच. जे गेले ते सरकारच्या कटकारस्थानाचा हिस्सा होते. त्यांना लालकिल्ल्यावर जाण्यापासून रोखले का नाही? असा सवाल करीत राकेश टिकेत यांनी घणाघात केला.

राजा घाबरला की गढी सुरक्षित करतो

यावेळी राकेश टिकैत यांनी मोदी सरकारवर जोरदार हल्लाबोल केला. राजा जेव्हा घाबरतो तेव्हा तो आपली गढी सुरक्षित करतो. सध्या तेच सुरू आहे. त्यामुळेच रस्त्यावर खिळे ठोकले जात आहेत. उद्या भाकरीवरही खिळे ठोकले जातील, पण या खिळय़ांना शेतकरी घाबरणार नाही. रस्त्यांवरील खिळय़ांवर पाय ठेवून आम्ही पुढे जाऊ असे टिकैत यांनी सांगितले. ही लढाई शेतकरी जिंकणार आहे. हे आंदोलन शांततेत सुरूच राहिल. जोपर्यंत कायदे रद्द होत नाहीत तोपर्यंत माघार नाही.

कानून वापसी नाही केली तर गद्दी वापसी होईल. शेतकरी सरकारचे सिंहासन परत घेतील असा इशारा त्यांनी दिला. कृषी कायदे रद्द करण्याच्या मुद्दय़ावर सरकारने शेतकऱयांबरोबर चर्चा पुन्हा सुरू करावी असे आवाहनही त्यांनी केले.

40 लाख ट्रक्टर घेऊन रस्त्यावर उतरू

कृषी कायदे रद्द केलेच पाहिजेत. ऑक्टोबरपर्यंत आंदोलन करण्याची आमची तयारी आहे; परंतु सरकारने जर शेतकऱयांचे ऐकलेच नाही तर 40 लाख ट्रक्टर घेऊन देशभरात रॅली काढू. एका राज्यातून दुसऱया राज्यात ही रॅली जाईल, असा इशारा राकेश टिकैत यांनी ‘एएनआय’शी बोलताना दिला आहे.