निष्पाप जीवांशी क्रूरपणे वागत त्यांच्या मृत्यूस कारणीभूत ठरल्याच्या घटना गेल्या काही वर्षात वाढीस लागल्या आहेत. गर्भवती हत्तिणीला फटाके भरलेला अननस खाऊ घालत तिच्यासकट पोटातील पिल्लाला ठार मारल्याच्या घटनेचे पडसाद फक्त देशातच नाही तर संपूर्ण जगात उमटले होते. तमिळनाडूमध्ये पुन्हा एकदा निष्पाप हत्तीचा मानवाच्या विकृत चाळ्यांमुळे जीव गेला आहे. ही घटना निलगिरी भागातील आहे. या हत्तीवर उगाच वेडेचाळे करणाऱ्या काही लोकांनी जळतं कापड फेकलं होतं.
निलगिरी जिल्ह्यातील मसिनागुडी भागात असलेल्या एका रिसॉर्टच्या परिसरात हा हत्ती फिरत असताना त्याच्यावर हे कापड फेकण्यात आलं होतं. जळतं कापड या हत्तीच्या कानावर पडलं होतं. कापड काढता येत नसल्याने हत्तीला काहीच सुचेनासं झालं होतं. कापड जळून खाक होईपर्यंत हत्तीचा कान भाजला होता. काही दिवसांपूर्वी सिंगारा वनक्षेत्र परिसरात स्थानिकांना हा हत्ती वेदनेने विव्हळताना दिसला होता. बोक्कापुरम भागातील नागरिकांनी वन विभागाच्या अधिकाऱ्यांना या जखमी हत्तीबाबत कळवलं होतं. अधिकाऱ्यांनी घटनास्थळी पोहोचल्यानंतर हत्तीला गुंगीचं औषध दिलं होतं. ज्यानंतर त्यांनी हत्तीची बारकाईन पाहणी केली असता हत्तीच्या कान आणि पाठीच्या भागाजवळ त्यांना जखमा दिसून आल्या होत्या.
हत्तीवर जळतं कापड फेकल्यानंतर तो सैरावैरा धावत असतानाचा व्हिडीओ हा व्हायरल झाला असून या व्हिडीओमुळेच हा प्रकार उघडकीस आला आहे . या व्हिडीओच्या आधारे प्रसात आणि रेमंड डीन नावाच्या दोन व्यक्तींना अटक करण्यात आली आहे. या व्यतिरिक्त रिकी रायन नावाची व्यक्तीही या घटनेत सामील असल्याची पोलिसांना माहिती मिळाली आहे. तिसऱ्या आरोपीला पोलिसांनी अजून अटक केलेली नाहीये. इतर दोन आरोपींना न्यायालयात हजर केलं असता त्यांना पोलीस कोठडी सुनावण्यात आली आहे.
ही घटना 3 जानेवारीची असून मुडूमलाई वनक्षेत्राचे संचालक एलसीएस श्रीकांत यांनी सांगितलं की अटक केलेल्या आरोपींमध्ये रिसॉर्टच्या मालकाचाही समावेश आहे. हत्ती रिसॉर्ट परिसरात फिरत असताना मध्यरात्री त्याच्यावर हे कापड फेकण्यात आलं होतं. यावेळी आरोपींपेकी एकजण हा दारूच्या नशेत होता असंही श्रीकांत यांनी सांगितलं आहे. ज्या रिसॉर्टबाहेर हा प्रकार घडला ते रिसॉर्ट सील करण्याचे आदेश निलगिरीच्या जिल्हाधिकाऱ्यांनी दिले आहेत.
सौजन्य : दैनिक सामना
