राज्यपाल नियुक्त आमदारांच्या रखडलेल्या नियुक्त्यांवरून उपमुख्यमंत्री अजित पवार यांनी तीव्र नाराजी व्यक्त केली. राज्यपालांनी आता अंत पाहू नये. नियुक्तीचा अधिकार त्यांचा असला तरी त्याला काही काळवेळ, मर्यादा आहे की नाही, असा संतप्त सवाल त्यांनी केला.
राज्यपाल नियुक्त आमदारांच्या प्रस्तावावर राज्यपाल भगतसिंग कोश्यारी यांनी निर्णय घेतलेला नाही. पुणे दौऱयावर असलेल्या उपमुख्यमंत्री अजित पवार यांचे याकडे पत्रकारांनी लक्ष वेधले. यासंदर्भात राज्यपालांची वेळ घेऊन चर्चा करणार असल्याचेही त्यांनी सांगितले. विधान परिषदेसाठी नावांची शिफारस करताना महाविकास आघाडी सरकारने सगळे नियम, अटी पाळल्या आहेत. मंत्रिमंडळात ठराव मंजूर करण्यात आला. मुख्यमंत्र्यांच्या सहीने 12 नावांचे पत्र लिहिले आहे. एवढं सगळं झालेलं असताना ज्यांची अंतिम सही व्हायला हवी तेच सही करत नसल्याचे अजित पवार म्हणाले.
पुणे पालिकेच्या निवडणुकीत मतविभागणी होऊ नये आणि ग्रामपंचायतीसारखे यश मिळावे यासाठी आमचा प्रयत्न असेल. सासूचे दिवस संपलेत, आता सुनेचे दिवस आले आहेत. त्यानुसार मतदार विचार करतील, असा टोलाही पवार यांनी विरोधी पक्षातील भाजपला लगावला.
