□ ईव्हीएममधील गडबडीच्या तक्रारींकडे लक्ष द्या – सर्वोच्च न्यायालयाचे निवडणूक आयोगाला ‘टोचन’.
■ या आयोगाला टोचन लावून भंगारात नेऊन टाकण्याची वेळ येणार आहे लवकरच, इतका तो निष्क्रीय झालेला आहे.
□ कोविड बॉडी बॅग घोटाळ्याचे पुरावे नाहीत; मिंधे सरकारच्या सुडाच्या राजकारणाला दणका.
■ मतदार या गद्दार वृत्तीच्या सडलेल्या ‘बॉडी’ला बॅगेत भरून विसर्जन करायला सज्ज होत आहेतच!
□ मोदींचा सत्तेचा उन्माद रोखायलाच हवा – शरद पवार.
■ जनतेला सक्षम, ठोस पर्याय दिसला की ती तो रोखेलच.
□ केजरीवाल यांना तुरुंगातच मारण्याचा भाजपचा कट – ‘आप’चा गंभीर आरोप.
■ सत्तेसाठी कोणत्याही थराला जाणारी नीच प्रवृत्ती आहे ही!
□ मिंध्यांकडून एसटी गाड्यांवर निवडणूक जाहिराती.
■ निवडणूक आयोग झोपला आहे काय?
□ नरेंद्र मोदी हे फेल झालेले इंजीन – काँग्रेस प्रदेशाध्यक्ष नाना पटोले.
■ त्याच्या मागे दुर्दैवाने देशाची गाडी जोडलेली आहे… ते वेळेत विलग केलेले बरे.
□ मोदींना दुसर्‍याचे श्रेय लाटण्याची सवय – भाजपचे माजी खासदार स्वामी यांची टीका.
■ स्वत:चे काही करायला कर्तबगारी लागते, काही न करता ढोल वाजवायला बेपारी होशियारी लागते, तेवढीच त्यांच्यापाशी आहे.
□ मला दिल्लीला जाण्याची हौस नाही – पंकजा मुंडे.
■ तुमच्या हौसेला तुमच्या पक्षात विचारतो कोण?
□ धमकी देणार्‍याला माझा नंबर द्या – सुप्रिया सुळे यांचे मतदारांना आवाहन.
■ अशा धमक्या देणारे भ्याड असतात, समोरासमोर नडत नाहीत. जरा आवाज झाला की बिळात जातात.
□ भाजपची सत्ता आल्यास निवडणुका, आरक्षण संपवतील – आम आदमी पार्टीचा मोदी सरकारवर हल्ला.
■ त्यांची एकंदर वाटचाल त्या दिशेने चालली आहे. मात्र सगळ्या भारतावर ते हा नरकात जाण्याचा अजेंडा लादूच शकणार नाहीत. यादवीकडे नेत आहेत देश.
□ भाजप, मनसेची अंतर्गत नाराजी मिंधेंना भोवणार – कल्याणमध्ये श्रीकांत शिंदेंचे टेन्शन वाढले.
■ भाजप, मनसे कशाला, तिथले असली शिवसेनेचे कट्टर शिवसैनिकही पुरेसे आहेत त्यांना घरी बसवायला.
□ सरकारच्या टुकार साड्या आदिवासी महिलांनी भिरकावल्या
■ मुळात बरोब्बर निवडणुकीच्या काळात भिकारड्या का होईना, साड्या वाटणं हा आचारसंहितेचा भंग नाही का?
□ गारेगार माथेरानची झाली भट्टी; पारा ४० अंशावर.
■ आता तिथले लोक कोणत्या थंड हवेच्या ठिकाणी जातील?
□ रामनवमीला प. बंगालमध्ये भाजपाने हिंसाचार घडवला – ममता बॅनर्जींचा गंभीर आरोप.
■ त्यांनी जय सियारामचा गोडवा जय श्रीरामच्या ऊग्र युद्धघोषणेत बदलला आहे तो यासाठीच. तोंडी राम आणि बगलेत नथुराम घेऊन फिरतात ते.
□ लोकहो, पाकीटमार शोधा – शरद पवारांचे आवाहन.
■ ज्यांनी स्वेच्छेने पाकीट काढून, वर शकुनाचा एक रुपया ठेवून, हळद, कुंकू, अक्षता वाहून पाकीट या भामट्यांच्या हातात दिलं आहे, त्यांचं काय करणार पवार साहेब!
□ बेकायदा फेरीवाल्यांना नोटीस कशाला? सरळ उचला! – हायकोर्टाचे महापालिकेला निर्देश.
■ आणि मग हप्ते काय हायकोर्टाचे पट्टेवाले देणार? काहीतरीच काय ओ जजसाहेब!
□ उत्तर मुंबईत भाजपने दिला दिल्लीचा नेता पियूष गोयल.
■ कोणी गोविंद घ्या, कोणी गोपाळ घ्या म्हणत त्यांचं बारसं जेवायला त्यांचेच इथले लोक पुरेसे आहेत.
□ महाविकास आघाडीच्या झंझावातापुढे छगन भुजबळांनी हात टेकले; नाशिक मतदारसंघातून माघार.
■ असेही पडणारच होते. झाकली मूठ सव्वा लाखाची राहिली, इतकंच.
□ मोदींनी देश विकून देश चालवला, त्याला विकास म्हणायचे का? – नाना पटोले.
■ डोक्यात मेंदूच्या जागी गोमय भरलेल्या भक्तांना कसं समजावून सांगणार पण हे नाना!
□ मराठा आंदोलकांनी अशोक चव्हाणांची सभा उधळली.
■ असाही त्यांच्या सभेने काय फरक पडणार होता, सुंठेवाचून खोकला गेला.
□ पुढच्या दोन महिन्यांत एकनाथ शिंदे दिसणार नाहीत – प्रकाश आंबेडकर यांचा दावा.
■ त्यांच्याविना महाराष्ट्राचं राजकारण किंवा सार्वजनिक जीवन ओसही पडणार नाही… त्यांना पाहण्याची इच्छा तरी कोणाची आहे?
□ स्मृती इराणी यांनी अमेठीत केलेली पाच कामे सांगावीत – काँग्रेसचे आव्हान.
■ अमेठीत? कुठेही केलेली पाच कामं सांगावीत!
□ शहापुरात महायुतीच्या प्रचाराचा फ्लॉप शो; भाड्याने आणलेल्या माणसांची जेवणासाठी रेटारेटी.
■ लोक प्रचाराला भाड्याने येतात तेव्हा ते जेवणासाठीच येतात बिचारे.
□ मिंधेंच्या आचारसंहिता भंगाकडे प्रशासनाची डोळेझाक.
■ प्रशासन ताटाखालचं मांजर बनून बसलेलं आहे यांच्या.