नरेंद्र मोदी
मिटवून टाकीन विरोधकांचे
देशामधले नामोनिशाण
एक नेता, एक देश
बाकी सगळे दगड पाषाण
मी म्हणेन तेच सत्य
एक देश, एक माटी
एक देश, एक इलेक्शन
हुकूम लादतो तुमच्यापाठी
मीच सक्षम, बाकी चक्रम
सगळे मंत्री माझे नोकर
नेता म्हणजे नरेंद्र मोदी
बाकी सगळे आहेत जोकर
———-
देवेंद्र फडणवीस
मी आहे होम मिनिस्टर
वाटले होते संसार मुठीत
आंदोलकांचा भडका पाहून
मीच लपलो माझ्या मठीत
पाशवी लाठीमार करून
पोलिसांनी केला कहर
तीन दिवसांनी क्षमा मागून
थोपवले टिकेचे जहर
तरीही उपयोग नाही झाला
लोक ओळखतात थापेबाजी
आता मात्र कठीण आहे
होणार लवकर मंत्री माजी
———-
एकनाथ शिंदे
फक्त आरक्षणाशिवाय
जे जे मागाल ते ते देतो
तुम्ही फक्त मागून बघा
म्हणाल ते ते, हो हो म्हणतो
आपले काहीच जात नाही
राज्य जरी गेले बुडीत
छप्पर फाडके दिल्ली देते
खूश आहेत माझ्या उडीत
सगळ्या गद्दारांना जमवून
गाठायचाय मोठा पल्ला
बाहेरचेच आहेत सारे
भाजपवाले करतील कल्ला
———-
अजितदादा पवार
फायलींवरती नजर त्यांची
बघा कसे टपलेत बोके
एक दाढी खाजवत बघतो
दुसरा म्हणतो नाही ओके
या दोघांच्या पहार्‍यामुळे
नाही करता येत मनमानी
अंतिम निर्णय तेच घेतात
करून माझी मानहानी
अस्सा एकदा शिकवीन धडा
जन्मभर याद राहील
अजितदादा किती मोठा
माझी पॉवर जनता पाहील
———-
पंकजा मुंडे
एक फुल दोन हाफ
टेन्शनमध्ये का बरं शिरले
चिंतातूर चेहरे पाहून
माझे तर डोकेच फिरले
एकमेकांचे पाय खेचणे
हा तर त्यांचा लाडका खेळ
पाण्यात पाहती एकमेकांना
त्यातच त्यांचा जातो वेळ
कसला कारभार करणार तिघे
भाजप आमची झाली बदनाम
करतील सरकारचे वाटोळे
भाजप घेईल रामनाम रामनाम