□ केंद्रीय बोर्डाच्या दहावीच्या पुस्तकातून ‘लोकशाही’ गायब.
■ ती मुळात देशातून टप्प्याटप्प्याने गायब होत असताना शाळेच्या पुस्तकांमध्ये हवी कशाला?
□ अदानी-हिंडेनबर्ग प्रकरणांवर काँग्रेसचे मोदींना १०० प्रश्न.
■ तुम्ही १००० किंवा एक लाख प्रश्न विचाराल… उत्तर मिळणार आहे का? ते देण्याची त्यांना सवय आहे का? शिवाय ज्याच्या धडावर स्वत:चं डोकं आहे, त्याला उत्तर माहिती आहेच.
□ महामंडळांवरील नियुक्त्यांचा पत्ता नाही, तरीही आणखी महामंडळाची भर.
■ गाजरांची शेती आहे, पुंग्या करून वाटत आहेत. वाजते की नाही हे बघेपर्यंत वेळ मिळतो.
□ थिल्लर भाषा वापरणार्‍या आमदार संजय शिरसाट यांना क्लीनचीट हा तर एकतर्फी निकाल – उपनेत्या सुषमा अंधारे.
■ ताई, निकाल आपल्या बाजूने मिळाला असता, तरच आश्चर्य वाटायला हवे होते.
□ जनाधार नसलेला शिंदे गट भाजपवासी होईल – राष्ट्रवादीचे प्रदेशाध्यक्ष जयंत पाटील.
■ आणि नंतर इतिहासात जमा होईल… यांना ते तिकीटं देणार आहेत?
□ आरक्षणाच्या नावाखाली मराठा-कुणबी भांडण लावण्याचे भाजपचे षड्यंत्र.
■ दोघांत भांडण झालं नाही, तर तिसर्‍याचा लाभ होणार कसा?
□ मत्स्यव्यवसाय विभागात ‘भरती’ला ओहोटी.
■ आता अदानी उतरले या व्यवसायात की मग तेच करतील भरती.
□ दुर्गम भागातील आरोग्य कर्मचार्‍यांच्या बदल्यांमध्ये घोडेबाजार.
■ सुगम भागातल्या भरतीत तो होत नाही काय?
□ भिवंडी पालिकेत कर्मचार्‍यांचे ‘आओ जाओ घर तुम्हारा’ – बायोमेट्रिक हजेरी यंत्रणेचे तीन तेरा.
■ सीसीटीव्ही बसवलेले असतील ना? त्यातलं रेकॉर्डिंग तपासून पगार काढा त्याप्रमाणे एकदा. आपोआप यायला लागतील वेळेत त्यानंतर.
□ मी भाजपची, पण भाजप माझा पक्ष नाही – पंकजा मुंडे.
■ तो कधीच तुमचा पक्ष नव्हता. पण, हेच किती काळ सांगत राहणार ताई. एकदा धडा शिकवा कानामागून येऊन तिखट झालेल्यांना.
□ विरोधकांची एकजूट भाजपला सत्तेतून बाहेर फेकेल – राहुल गांधी.
■ त्यासाठी सगळे मतभेद बाजूला ठेवून ती व्हायला हवी आणि नमती भूमिका घेऊन काँग्रेसनेच सगळ्यांना एकत्र आणायला हवे.
□ गणेशोत्सव काळातील बुकिंगमध्ये रेल्वेची हातचलाखी.
■ बाहेर एजंट नाडतात प्रायव्हेट गाड्यांचे, आत यांची हातचलाखी. आता लोकांनी उत्सव करायचा तरी कसा?
□ शिवराज्याभिषेक सोहळ्यात प्रोटोकॉलचा कडेलोट; शिवभक्तांची अडवणूक, खासदारांनाही दुय्यम वागणूक
■ महाराज स्वर्गातून अवतरले असते, तर त्यांनाही अडवलं असतं या मूर्खांनी. ज्यांच्यासाठी सोहळा त्या शिवभक्तांनाच अडवताय? डोकी आहेत की खोकी?
□ पावसाळ्यापूर्वीच मुंबईकर खड्ड्यांनी बेजार- सुनील प्रभू यांचा आरोप.
■ पावसाळ्यात मोदीजी तरण तलावही देणार आहेत ना रस्तोरस्ती! ही त्याचीच तयारी आहे सुनीलजी.
□ मोदी सरकारविरुद्ध लढाईत केजरीवाल भाजप खासदारांचाही पाठिंबा मागणार.
■ ज्यांना आपण आपल्या कामाच्या बळावर निवडून येतो, असा आत्मविश्वासच नाही, असे मोदीनामाचा शेंदूर लावलेले दगड कसला पाठिंबा देतायत केजरीवालांना!
□ शिंदे-फडणवीसांमध्ये निवडणुकांना सामोरे जाण्याची धमक नाही – काँग्रेस नेते पृथ्वीराज चव्हाण.
■ निवडणुकांमध्ये आपलं काय होणार आहे, हे त्यांना नीट माहिती आहे. आपल्या हातांनी आपल्या पायांवर कुर्‍हाड मारून कोण घेईल.
□ दक्षिण मुंबईतील अनधिकृत फेरीवाल्यांना राज्य सरकारचे संरक्षण?
■ तेवढीच मुंबई फेरीवालामुक्त राहिली होती बर्‍यापैकी. आता तिचीही वाट लावून टाका एकदाची.
□ राजकीय दडपशाहीमुळे ठाण्याचा नरक झाला – राजन राजे (धर्मराज्य पक्ष).
■ महाराष्ट्राच्या सगळ्या शहरांची हीच स्थिती व्हायची नसेल तर जनतेने ही पार्सले वेळीच खोक्यात बंद करून खाडीत भिरकावून दिली पाहिजेत.
□ रतिक्रीडेला खेळ म्हणून मान्यता, आठ जूनपासून स्वीडनमध्ये स्पर्धा, २० स्पर्धक जोडप्यांची नावनोंदणी.
■ घ्या आता. आपली लोकसंख्या पाहता या खेळात सगळ्यात पटाईत आपण. आपल्याला बाजूला ठेवून हे लोक काय स्पर्धा घेत आहेत?
□ एक रुपयाचं काम करायचं आणि दहा रुपयांचं दाखवायचं, असं सध्या राजकारणात सुरू आहे – हरभजन सिंग.
■ ईडीपीडा लावून घ्यायची आहे का तुला भज्जी! देशाच्या सर्वोच्च नेतृत्त्वाबद्दल जरा जपून बोल.
□ सर्व बेईमानांचे निवडणुकांमध्ये पानिपत होईल- संजय राऊत.
■ आधी त्यांना निवडणुकीत तिकीट तरी मिळेल का, राऊत साहेब!
□ रेल्वे अपघाताच्या ठिकाणी रेल्वेमंत्र्यांची चमकोगिरी, हेल्मेट न घालता रेल्वेखाली घुसून पाहणी.
■ हा रोग वरून सुरू झाला आहे, तो खालपर्यंत झिरपणारच… फोटो काढून घेण्यासाठी काहीही करायला तयार होतात हे लोलूप.
