□ टेंभी नाक्याच्या नवरात्रोत्सवाचा राजकीय वापर झाला, रश्मी ठाकरे यांनी केलेल्या पूजेवर मुख्यमंत्री एकनाथ शिंदे यांची नाराजी.
■ तुम्ही मुख्यमंत्रीपदाचं कामधाम सोडून गणेशोत्सवापासून या मंडपातून त्या मंडपात सदा वणवण करत फिरताय ते भक्तिभाव उचंबळून आल्यामुळे की काय!
□ मोदींना घराणेशाही संपवायची आहे, मी पण घराणेशाहीचे प्रतीक आहे, पण ते मला संपवू शकणार नाहीत. : पंकजा मुंडे.
■ नुसता बोलाची कढी आणि बोलाचाच भात आहे हो पंकजाताई… त्यांनी घराणेशाही हा शब्द उच्चारला की तुम्ही ‘जय अमित शहा’ एवढं म्हणा! विषय कट्!
□ घरगुती ग्राहकांना यापुढे फक्त १५ सिलिंडर मिळणार.
■ १५वा संपला की गटार शोधायचं जवळचं आणि टाकायचा पाइप! गॅसच गॅस! शिजवा काय शिजवायचं ते!
□ काँग्रेस अध्यक्षपदाची निवडणूक लढवायला निघालेल्या अशोक गेहलोत यांची तलवार म्यान, सोनियांची माफी मागितली.
■ काँग्रेसच्या परंपरेप्रमाणे बंडोबा थंडोबा झाले!!
□ जपानी बुलेट ट्रेनपेक्षा स्वदेशी वंदे भारत ट्रेन अधिक वेगवान, ताशी १०० किमी वेग पकडण्यासाठी लागतात फक्त ५३ सेकंद!
■ तरी पण देशाच्या बोडक्यावर एक लाख कोटींचं कर्ज चढवून बुलेट ट्रेन येणारच… हौसच तेवढी दांडगी आहे विश्वगुरूंची.
□ भारताची अर्थव्यवस्था ट्रिलियन्समध्ये जाईल. पण माझ्यासारखा भिकारी त्याच्यात काहीच करू शकणार नाही : राज्यपाल भगतसिंग कोश्यारी.
■ राज्यातल्या सगळ्या भिकार्‍यांची ‘आमचं घर’ म्हणून राजभवनासमोर रांग लागेल हो अशाने! द्याला का त्यांना तुमच्या ‘झोपडी’त जागा?
□ ९० दिवसांत मुंबईचा कायापालट करू : मुख्यमंत्री एकनाथ शिंदे.
■ मुंबई महानगरपालिकेच्या निवडणुकीत भारतीय जनता पक्षाला जिंकवून आणण्याची सुपारी पूर्ण केलीच पाहिजे… नाहीतर शोभेचं मुख्यमंत्रीपदही जाईल.
□ रिझर्व्ह बँकेकडून रेपो दरात पुन्हा वाढ.
■ एक दिवस गृहकर्ज घेतलेले लोक वैतागून घरं विकायला सुरुवात करतील तेव्हा अर्थव्यवस्थेचं कायमचं बंबाळं वाजेल!
□ शिवसेनेचा दसरा मेळावा एकच… शिवतीर्थावरच : शिवसेना पक्षप्रमुख उद्धव ठाकरे यांनी ठणकावले.
■ तोतयांचा दसरा मेळावाही एकच… तो एकदाच होणार… पुढच्या दसर्‍याला टांगा पलटी, घोडे फरार झालेले असणार…
□ दांडिया आणि गरब्यासाठी लाऊडस्पीकरची गरज नाही : हायकोर्टाचे परखड मत.
■ ते दांडिया आणि गरब्याचा गदारोळ संपेपर्यंत कोणाच्याही कानावर पडायचे नाही, नंतर पडून उपयोगाचे नाही…
□ पंतप्रधानांकडून फाइव्ह-जी सेवेचा शुभारंभ.
■ आता भाजपच्या आयटी सेलचा बनावट बातम्यांचा कचरा तुमच्या मोबाइलमध्ये पोहोचणार आणखी वेगाने!
□ टक्केवारीसाठी प्रकल्पांची अडवणूक नको : उपमुख्यमंत्री देवेंद्र फडणवीस.
■ ते काय ते वरती सेटिंग होऊन जाईल, तुम्ही फक्त रेटा!