संतोषराव निवडणूक निकालावर पैज लावायची झाली तर तुम्ही कशावर पैज लावाल?
– रमेश सोनावणे, चेंबूर
मुजरा करायला लावणार्यांना मुजरा करणारे मुजरा करायला लागतील… यावर पैज लावू शकतो.. पण कोणी पैज लावणार नाही, यावर सुद्धा पैज लावू शकतो… हे तुम्हाला कळलं असेल तरी तुम्ही बोलणार नाही.. लावता पैज? (पैज दोन्ही बाजूंनी लावावी लागते मिस्टर सोनावणे!)
तुम्हाला कधी कोणत्या अपराधासाठी निबंध लिहायला सांगितला होता का शाळेत?
– मारिया डिकोस्टा, नायगाव
तुम्हाला निबंध लिहिता येत नाही याची भीती वाटते का? एकच निबंध पाठ करून ठेवा. ‘माझे बाबा.’ माझे बाबा बिल्डर आहेत. ही एकच ओळ लिहा आणि पुढची गंमत पाहा…. (माझ्याबद्दल बोलाल तर माझी शाळा आणि ड्रायव्हिंग स्कूल मुंबईमधलेच आहे, एवढं उत्तर पुरेसं आहे. अजून स्पष्ट हवं असेल तर तुम्हाला पुण्यातच जावं लागेल… शिकण्यासाठी.)
सगळे पुरुष बायकांवर इतके विनोद करतात, बायकोमुळे आपण किती गांजलो आहोत, असं एकमेकांना सांगतात; इतका बायकांचा जाच आहे मग सगळे घर सोडून संन्यासी बनून हिमालयात का जात नाहीत?
– रेश्मा आंदेकर, जुन्नर
सगळे पुरुष हिमालयात गेले तर पुरुषांबरोबर बायकांचाही वांदा होईल ना… जेवणाचा… पुरुष काय जेवणार? आणि बायका कोणाला जेवायला घालणार? बरं… तरी पुरुष हिमालयात गेले, तर काही पुरुष भीक मागून खातील… ते हिमालयातून परत येतील आणि बायकांच मंगळसूत्र काढून घेऊन बायकांना सोडून देतील… आता बोला, सगळे पुरुष हिमालयात गेलेले चालतील?
या निवडणुकीत तुमच्या मनासारखा निकाल लागला नाही, तर तुम्ही काय करणार?
– बाळ पाटील, परभणी
निवडणुकीचा निकाल मनासारखा नाही लागला तरी निकाल आमच्या मनासारखाच लागलाय म्हणून बोंब मारणार. रात्रीच्या गाठीभेटी करून नंतर पक्ष बदलणार्यांमधले नाही आम्ही… आणि आम्हाला खात्री आहे… आम्ही कोणाला मत दिलं हे कुणी किती सर्च केलं तरी कळणार नाही. कारण निवडणूक आयोग त्यांचा डाटा xx कोणाला दाखवणार नाही. ता.की. ‘डाटा xx’ हा शब्द डाटा बीटा असा वाचावा.
सोशल मीडियावर सगळे लोक इतके शहाणे कसे असतात? त्यांना सगळ्यातलं सगळं कसं कळत असतं? तेही त्या त्या क्षेत्रात प्रत्यक्ष काम करत असलेल्या माणसांपेक्षा जास्त!
– दिलावर शेख, रहिमतपूर
फार कठीण असतं ते. उचललं बोट आणि केलं टाईप एवढं सोपं नसतं ते. डोकं बाजूला ठेवून करावं लागतं ते. तुम्ही करून बघा डोकं किती त्रास देत ते… (अर्थात असेल तर)
पुरुष पाच मिनिटांत ढीगभर खरेदी करतात, बायका तीन तास दुकानात बसून, सगळ्या सेल्समनना कामाला लावून एकही वस्तू न घेता बाहेर कशा पडू शकतात?
– दिवाकर पांगे, भाईंदर
तुम्ही नवीनच सेल्समन म्हणून रुजू झालेले दिसता. पांगे, अशा बायकांशी नका घेऊ पंगे. अशा बायकांबरोबर आलेल्या त्यांच्या नवर्याची अवस्था बघा… (बायका अशा नवर्यांना डेमो म्हणूनच खरेदीला नेतात ) तेव्हा शहाणे व्हा… त्यांच्या वाटेला न जाता, त्यांच्या वाटेने त्यांना जाऊ द्या… वाटल्यास अनुभवी सेल्समनचा सल्ला घ्या.
माणसांना लहानपणापासून बोलायला शिकवलं जातं, त्यांना ऐकायला मात्र कधीच का शिकवलं जात नाही?
– रवींद्र तिडके, नाशिक
तिडके साहेब, तुमचा गोंधळ होतोय. आपण बायकोपासून आपल्या इन्शुरन्स एजंटपर्यंत सगळ्यांच ऐकतो. कारण आपण माणसं आहोत. जे ऐकत नाहीत ते बायोलॉजिकल नसतात. ते काही विशिष्ट कामासाठी परमात्म्याकडून पृथ्वीवर पाठवलेले असतात. अशा बायोलॉजिकल नसणार्या अवतारी पुरुषांना ओळखा (ते ओळखणे सोप्प असतं. आपण बॉयलॉजिकल नाही असं ते स्वतः सांगतात). तेव्हा त्यांचा अवतार मान्य करा आणि त्यांना काही ऐकवायला जाऊ नका. त्यांच्या भक्तांकडून तुम्हालाच ऐकावं लागेल.
आपल्याला राजकारणात रस नाही, असं कौतुकाने कसं सांगतात लोक! राजकारणाचा स्पर्श नाही, असं एक तरी क्षेत्र आहे का?
– सुनील नाईक, पुणे
आपल्याला राजकारणातच रस नाही असं तोच सांगतो ज्याला राजकारण करून चोथाही मिळत नाही… राजकारणाचा स्पर्श नाही असं क्षेत्र कोणतं विचाराल तर ते क्षेत्र राजकारण हेच आहे… कुठल्याही राजकारण्याला विचारा तो हेच सांगेल की ‘ मी कधीच राजकारण करत नाही’. हे विरोधकचं राजकारणाला बदनाम करतात.