मास्कशिवाय फिरू नका, दोनशेचा दंड घेऊन पालिका मास्कही लावणार

पालिका कोरोना विषाणू संसर्गाचा प्रसार व प्रादुर्भाव आटोक्यात आणण्याकरिता मार्च 2020 पासून विविध उपाययोजना करीत आहे. कोरोना संसर्ग रोखण्यासाठी मास्क वापरणे सर्वेत्तम उपाय आहे. या पार्श्वभूमीवर पालिका आयुक्त इक्बाल सिंह चहल यांनी विना मास्क घराबाहेर फिरणाऱया नागरिकांना 200 रुपये दंड ठोठावण्याचे आदेश दिले होते. त्यानुसार, आतापर्यंत 4 लाख 85 हजार 737 नागरिकांवर कारवाई करून सुमारे 10 कोटी 7 लाख 81 हजार 600 रुपयांचा दंड वसूल करण्यात आला आहे. या कारवाई दरम्यान मास्क न लावता किंवा अयोग्य रीतीने लावून फिरणाऱया नागरिकांना मास्कची आवश्यकता देखील समजावून सांगितली जात आहे. मास्क नसल्यास दंड केल्यानंतर संबंधित नागरिक पुन्हा विना मास्क पुढे जातात. त्यामुळे मास्क वापराच्या मूळ उद्दिष्टांची पूर्तता व्हावी, यासाठी दंड करण्यासोबत संबंधित नागरिकास एक मास्क देखील पालिकेकडून मोफत पुरविला जाणार आहे. मास्क मोफत दिल्याची नोंद संबंधित दंडाच्या पावतीवर देखील केली जाणार आहे.