व्हॅलेंटाईन डे या दिवसाचे निमित्त साधून ‘हरीओम’ या सिनेमाचे नवीन पोस्टर नुकतेच प्रदर्शित करण्यात आले. अतिशय रोमँटिक वातावरण आणि प्रेमाच्या रंगात रंगलेले हे पोस्टर खूपच सुंदर आणि आकर्षक आहे. पोस्टरमध्ये दिसणारे ते दोघेजण या सिनेमातील मुख्य नायक आणि नायिका असावेत असा अंदाज बांधला जातोय. असे असूनही या दोघांचा चेहरा मात्र दिसत नाहीये.
गुलाबांच्या पाकळ्या आणि फुग्यांमागे त्यांचा चेहेरा लपला आहे. त्यामुळे हे दोघे नक्की कोण आहेत हे अद्यापही समजत नाहीये. काहीच दिवसांपूर्वी या सिनेमाचे पहिले पोस्टर प्रदर्शित झाले होते. तेव्हा पोस्टरवर छत्रपती शिवाजी महाराज होते. ते पाहून हा सिनेमा ॲक्शनपट असेल असा अंदाज लावण्यात येत होता, परंतु आता या सिनेमाचे दुसरे पोस्टर पाहून हा सिनेमा रोमँटिक असावा असे वाटतेय.
या चित्रपटाचे निर्माते हरिओम घाडगे आणि दिग्दर्शक आशिष नेवाळकर असून हा सिनेमा श्रीहरी स्टुडिओची प्रस्तुती आहे. अद्याप सिनेमाच्या प्रदर्शनाच्या तारखेची घोषणा केली नसली तरी हा सिनेमा लवकरच प्रेक्षकांच्या भेटीला येणार आहे हे नक्की.
