केदार विजय ग्रंथातील काही भागांना अनुसरुन कथा गुंफण्यात आलेली ‘दख्खनचा राजा ज्योतिबा’ ही मालिका आता उत्कंठावर्धक वळणावर येऊन पोहोचली आहे. आतापर्यंत मालिकेत छोटा ज्योतिबा दिसत होता. पण आता लवकरच मोठ्या ज्योतिबाची मालिकेत एण्ट्री होणार असल्याने प्रेक्षकांना आता ज्योतिबाच्या भव्यदिव्य रुपाचं दर्शन घेता येणार आहे. असुरांचा नाश करण्यासाठीच ज्योतिबा अवतारी रुपात येणार आहे. ज्योतिबाच्या या भव्यदिव्य रुपासोबतच यमाई आणि चोपडाई यांच्यादेखील अवताराची गोष्ट मालिकेमध्ये आता हळूहळू उलगडणार आहे. त्यामुळे ‘दख्खनचा राजा ज्योतिबा’ मालिकेच्या यापुढील भागांची उत्सुकता वाढणार आहे.
अभिनेता विशाल निकम मोठ्या ज्योतिबाच्या भूमिकेत दिसणार असून या भूमिकेसाठी त्याने बरीच मेहनत घेतली आहे. ज्योतिबाच्या अनेक पौराणिक कथा वाचण्यासोबतच सर्वात महत्त्वाची गोष्ट विशालने आत्मसात केली ती म्हणजे घोडेस्वारी. कमी कालावधीत विशाल घोडेस्वारी करायला शिकला आहे. यासोबतच विशालने या भूमिकेसाठी १२ किलो वजनही वाढवलं आहे. मूळचा सांगलीचा असल्यामुळे कोल्हापुरी भाषेचा लहेजा त्याला आपसुकच येत होता.
ही मालिका स्टार प्रवाह वाहिनीवर सोमवार ते शनिवार सायंकाळी ६.३० वाजता दाखवली जाते.
