मला जी आवडते, ती प्रत्येक मुलगी म्हणते, तू मला भावासारखा आहेस. मी आयुष्यात कधीच तुझ्याकडे तशा नजरेनं पाहिलं नाही. सांगा, मी काय करू?
– प्रणव राणे, भांडुप
दोन पर्याय आहेत, तुमच्याकडे ‘तशा’ नजरेने पाहील अशी मुलगी शोधा, किंवा तुम्हाला आवडणार्‍या मुलीकडे ‘तशा’ नजरेने पाहण्याची सवय तुम्ही करून घ्या. तुमच्या नजरेत भावाचेच भाव दिसत असतील तर बिचार्‍या ताया तरी काय करणार?
शिक्षक, पालक, शेजारी, नातेवाईक अशी सगळी मोठी माणसं सांगतात की अभ्यास कर, चांगले मार्क काढ… पेपरात वाचल्यावर कळतं की शिपायाच्या नोकरीसाठी पण ग्रॅज्युएट, डबल ग्रॅज्युएट अर्ज करत असतात. मग कशाला करायचा अभ्यास?
– आर्यन दळवी, भाईंदर
लोकांच्या प्रश्नांची उत्तरं देण्यासाठी तरी अभ्यास करावाच लागतो. (काही वेळेला अभ्यास केलेल्या माणसांनाही उत्तर टाळण्यासाठी, अभ्यास करून उत्तर देऊ असं सांगावं लागतं). शिपायाच्या नोकरीसाठी सुद्धा ग्रॅज्युएट, डबल ग्रॅज्युएट असल्याची ‘खरी’ प्रमाणपत्रं द्यावी लागतात… एखादाच असा मोठा माणूस असतो जो ‘खोटी ‘ प्रमाणपत्र देतो आणि ती प्रमाणपत्रं कोणी चेक करत नाही. तुम्हाला तसा मोठा माणूस बनायचं आहे का? पण लक्षात घ्या साधा ‘चायवाला’ बनण्यासाठीही चाय कसा बनवतात याचा अभ्यास करावा लागतो. मग अभ्यास न करता मोठा माणूस कसा बनतो याचा अभ्यास करावाच लागणार ना. सोप्प नसतं ते!
आमच्या माहितीतल्या एका काकांना इंग्लिशचा जराही गंध नाही. ते कुणालाही भेटले की त्याचा हात पकडून तीन चार इंग्लिश शब्दांचं एक घोटून पाठ केलेलं निरर्थक वाक्य बोलतात आणि फार मोठा विनोद केल्यासारखे ख्यॅ ख्यॅ करून स्वत:च हसता… तुम्ही काय करता?
– निनाद लेले, रांजणगाव
आम्ही तुमच्यासारखं वेड पांघरुण कॅनडाला जात नाही. ज्याच्याबद्दल विचारायचं त्याचं नाव घेऊन काय, रेफरन्स देऊनही प्रश्न विचारत नाही… आणि तुमच्यासारखे कोणी रांजणगावचं नाव सांगून कॅनडाचा प्रश्न विचारला तर उत्तर देतानाही नाव घेऊन उत्तर देत नाही… उगाच खाया पिया कुछ नही ग्लास तोडा बारा आना असं व्हायचं! तुम्ही तर लेले आहात उगाच ‘लेलें को देणे’ पडायचे!
हमारे को पहिली से हिंदी शिकणे का है? तुमरेका क्या जाता है?
– सदानंद पाचलग, बीड
तुमरेका जायेगा वहीच हमरेका जायेगा… भाषा हमारे अकेले के बाप की थोडी ना है। हमरेको क्या फक्त वोट देने का है (ओ भी वोटर लिस्ट में नाम रहेगा तोइच) तो हमरे का कुछ नही जाता है। आज हम ‘जाता में’ है। और जिनको हिंदी का पुळका आया है वो ‘सूप मे’ है। कल परसो वह सूप मे से जाता मे आयेंगे… तो हिंदी के जाता में वो भी भरडेंगे। चक्कर काल का हो या जाता का, किसी को नही छोडता…
इंग्लिशच्या नावाने खडे फोडणार्‍यांची मुलं कॉन्व्हेंट स्कूलमध्ये, पाकिस्तानच्या नावाने बोंबटणार्‍यांच्या मुलांचे बिझनेस पार्टनर पाकिस्तानमध्ये, गोरक्षण, गोसेवा यांचे महत्त्व सांगणार्‍यांच्याच समाजबांधवांचे बीफ एक्स्पोर्टचे धंदे… लोक तरी कसा विश्वास ठेवतात यांच्यावर?
– नेहा अत्रे, कल्याण
तुम्ही म्हणताय त्या सार्‍यांना माहित आहे की त्यांच्यावर लोकांचा विश्वास नाही आहे, पण त्यांचा ज्यांच्यावर विश्वास आहे त्यांचा ईव्हीएम, ईडी,सीबीआय, ईसी, एचसी, मीडिया यांच्यावर विश्वास आहे… आणि हे आपला विश्वासघात करणार नाहीत याची खबरदारी त्यांच्यावर विश्वास असणार्‍यांनी घेतलेलीच आहे. आणि इतके पगारी चाटूकार असताना लोकांच्या विश्वासाला काय चाटायचंय (असं विरोधकांचं म्हणणं आहे… आमचं म्हणणं सांगणार नाही कारण आमचा लोकांवर विश्वास नाही)!
मुख्य नेते ‘आणि म्हणोन’ भाषण ठोकत असताना थैलीबाज, खोकेबाज नेते आणि उपनेते मागे डुलक्या काढत असतात… याला काय अर्थ आहे?
– प्रदीप दांडेकर, शिवडी
त्यातला अर्थ कळण्यापेक्षा त्यातलं अर्थशास्त्र तुम्हाला कळलं असतं तर तुम्ही सुद्धा उपनेत्यांच्या मागे डुलक्या काढायला गेला असता. हर्षवर्धन इंदापूरकरांना विचारा. घरी चार भिंतीत झोप येत नव्हती डुलक्या काढणार्‍या अर्थशास्त्रींना… आता खुलेआम झोप काढतात म्हणजे काहीतरी अर्थ आहे ना त्यात. ज्याच्यामागे डुलक्या काढतात त्याला माहिती आहे डुलक्या काढणारे आपल्यामागे आहेत म्हणून मी पुढे आहे… डुलक्या काढणार्‍यांना माहिती आपण ज्याच्यामागे आहोत तो आपल्यापुढे आहे म्हणून आपण आहोत… हाच त्यातला अर्थ आहे. काही लोकांना तो स्वार्थ वाटतो त्याला नाईलाज आहे.