धर्मेंद्र नेहमी सिनेमात कुत्ते, कमीने असं का ओरडायचा? कुत्रे काही जास्त नेत असतील, अशी त्याला शंका असायची?
– सौरभ सावंत, कुडाळ
ही तर लघुशंकेपेक्षा छोटी शंका आहे.
तुमच्या मते सर्वोत्तम मिसळ कुठली? पुण्याची, कोल्हापूरची, नाशिकची की आणखी कुठली?
– सावनी वीर, ठाणे
मी काय बारा गावची मिसळ खाल्लेला वाटतो की काय?
जी इमारत बांधून पूर्ण झालेली असते, तिला ‘बिल्डिंग’ असं का म्हणतात?
– अशोक परब, ठाणे
मलाही माहीत नाही, म्हणून मी अपार्टमेंट म्हणतो. टॉवर म्हणतो. नाहीतर इमारत म्हणतो (आता अपार्टमेंट, टॉवर, इमारत का म्हणता म्हणून विचारू नका.)
मला मोठं होऊन राज्यपाल बनायचं आहे. मी त्यासाठी काय तयारी करू?
– विनीत वर्तक, पाचोरा
ज्याची पोळी खाल, त्याचीच टाळी वाजवायला शिका.
आयुष्याचे बारा कधी वाजतात?
– रवींद्र सोन्नर, आळंदी
रात्री आठ वाजता..कोणी ‘मीत्रो’ अस म्हटलं की..
तुम्हाला साडी आवडते की मिडी?
– प्रथमेश शिंदे, कळवा
का काडी करताय?.. साडी आणि मिडीमध्ये माझी खटीयाखडी होईल. (धुवायला, इस्त्री करायला आणि घडी मोडायला जी बरी ती आवडते.. स्वतःला विचारून पहा)
सीमा प्रश्न कसा सुटेल?
– जगन्नाथ शेळके, संभाजीनगर
मला प्रश्न विचारून नक्कीच नाही सुटणार.. ज्यांना विचारायचा त्यांना नाही विचारणार.. रस्त्यावरही नाही उतरणार… पण असे प्रश्न सोडवणारा एखादा अ‍ॅप आला की ‘आपोआप’ सुटेल. (आता ऑनलाईन आंदोलनाचा जमाना आहे ना मामा.)
‘वारा गाई गाणे’ या गाण्यात वारा गाताना दिसतच नाही हो, याला काय अर्थ आहे?
– शारदा सांगळे, घाटकोपर
का शोधताय वारा… जो बरोबर आहे तो नाहीय का बरा? आणि कसा दिसेल वारा?? सत्ताधार्‍यांच्या डोक्यात घुसलाय ना तो (असं विरोधक बोलतात… मी नाही हं.)
समजा, पेट्रोलच्या गाडीत डिझेल टाकलं तर काय होईल?
– शाल्मली पाठक, पुणे
टाकणार्‍याची आय माय एक होईल.
हिरवा रंग सहन होत नाही म्हणून आमच्याकडे एकाने सगळ्या झाडांची पाने रंगवायला घेतली आहेत. त्याला काय सांगू?
– राजा गावकर, पिंपरी, पुणे
कंबरेला गुंडाळण्यासाठी थोडी हिरवी पाने ठेव म्हणावं… उद्या अजून अच्छे दिवस आलेच तर कंबरेला गुंडाळणार काय? मग ‘बेशरम अंग’ असं गात फिरावं लागेल. तेसुद्धा घरच्या दीपिका बरोबर.
माणुसकीपेक्षा मोठा धर्म दुसरा नाही, हे तथाकथित धार्मिकांना पटवून कसं द्यायचं?
– सुरेश चिंदरकर, पर्वरी
‘यदाकदाचित’ त्यांना पटेल अस वाटून पटवण्याचा प्रयत्न केलाय मी… बायको पटली… पण ‘त्यांना’ माझं म्हणणं नाही पटलं. तुमचं ऐकून ‘त्यांना’ परत पटवायला जायचो… दुसरी बायको पटायची… नंतर दोघींचं नाही पटणार.
व्हॉट्सअपवरच्या फॅमिली ग्रुपांमधले मोदीभक्त सकाळ संध्याकाळ आरती गाऊन आणि फॉरवर्डेड थापांचा मारा करून बेजार करतात. ग्रूप सोडता पण येत नाही. त्यांना काही सांगून फायदाही होत नाही. या त्रासावर तुमच्याकडे काही उपाय आहे का?
– शोभा चितळे, डोंबिवली
चितळे ताई, चितळेंचा फॉर्म्युला उलटा वापरा… दुपारी एक ते चार व्हॉट्सअप चालू ठेवा. सकाळ संध्याकाळ बंद ठेवा. सुज्ञास जास्त सांगण्याची गरज नाही.
कठीण काळात परकी माणसं मदतीचा आधार देतात, आपले पाठ फिरवतात. मग आपले कोण म्हणायचे?
– पैगंबर खान, सांगली
आपल्याकडे तोंड करून झोपतो तो आपला… परका पाठच करून झोपणार… मग काळ कठीण असो की नरम.