तुम्हाला कुणी तिळगुळ दिला तर तुम्ही गोड बोलता का हो?
– वैखरी सातपुते, नागपाडा
बाह्य गोष्टीने काही गोड बीड बोलता येत नाही… उद्या एखाद्याला कारले खायला दिले म्हणून तो कडू बोलेल का?
मी विचारतो मांगले चाचा,
तुमचा मी भाचा,
मला तो म्हणतो चांगले वाचा,
हा सन्मान कुणाचा?
– संजय पोकळे
‘तो’चा!
पौष महिन्यात लग्न का करत नाहीत? एखाद्याने केले तर काय बिघडेल?
– फाल्गुनी शिंदे, सोमवार पेठ, पुणे
तुम्ही करून पहा… मग समजेल!
चीनने कृत्रिम सूर्य बनवल्याची बातमी वाचली. भारत कधी असा सूर्य बनवेल?
– यशवंत झाडबुके, सांगली
आपल्याकडे नाक्यानाक्यावर पोस्टरांवर एवढे सूर्य आहेत, तर अजून आकाशात कशाला??
कोरोनाचे सगळे नियम निवडणुकांच्या सभांमध्ये, मेळाव्यांमध्ये कसे लागू होत नाहीत? तिथे काही वेगळं संरक्षण असतं का?
– पुष्पेष संत, नारायणगाव
सगळं सोयीने असतं… आपल्याला कळतात गोष्टी, पण आपण बोलत नाही.
मला चित्रकलेच्या शिक्षकांनी हवेचे चित्र काढून आणायला सांगितले आहे… कसे काढू?
– बागेश्री कदम, श्रीवर्धन
नुसता कागद नेऊन दाखवा.
लिपस्टिक फक्त स्त्रियाच का लावतात? हा पुरुषांवर अन्याय नाही का? पुरुषांनाही ओठ असतातच ना?
– मंदार सोनार, सावली, चंद्रपूर
पुढाकार घेणारा कसा लावेल लिपस्टिक?… आकर्षित करणारा लावणार!
तुमची कोणत्या नृत्यप्रकारावर हुकुमत आहे?
– तीर्थंकर देवरे, अहमदनगर
आकांत तांडव!
तुम्हाला संगीताचा कोणता प्रकार सगळ्यात जास्त आवडतो? भावसंगीत की शास्त्रीय संगीत? गझल, टप्पा, ठुमरी, तराणा, कव्वाली, लावणी, नाट्यपद की फिल्मी संगीत?
– विद्याधर शेलाटकर, सानपाडा
शास्त्रीय संगीत
शारीरिक व्यंगावरून केलेल्या विनोदांना हिणकस मानतात… पण मग टुणटुण किंवा गुड्डी मारुती किंवा मधु आपटे यांनी आपलं व्यंगच तर विनोदासाठी वापरलं ना?
– निलेश बोडके, वैजापूर
स्वतःवर कुणी तसे विनोद करत असेल तर ठीक असतं… आणि मुख्य म्हणजे वरील कलावंतांना त्याचे पैसे मिळाले हो!
नकलाकार आणि विनोदी अभिनेता यांच्यात फरक काय?
– सोनाक्षी सावंत, कणकवली
कुणाची तरी जशीच्या तशी नक्कल करणे वेगळे आणि सोपे आहे. समाजातल्या अनेक व्यक्तींचे, घटनांचे निरीक्षण करून स्वतःच्या शैलीने जो व्यंग सादर करतो त्याला विनोदवीर म्हणतात.
चार्ली चॅप्लिनसारखा श्रेष्ठ विनोदवीर आपल्याकडे कधी निर्माण होईल?
– मिल्टन परेरा, नालासोपारा
तेवढं दुःख पाहणारा कुणी असेल तेव्हा होईल निर्माण!
अधिक आव्हानात्मक काय? कॅमेर्‍यासमोरचा अभिनय की प्रेक्षकांसमोरचा जिवंत अभिनय?
– इर्शाद शेख, सातारा
जिवंत अभिनय!
खरा तो एकचि धर्म, जगाला प्रेम अर्पावे, अशी प्रार्थना शाळेत गाणारे नंतर कोणत्या तरी एका धर्माचे कट्टर पाईक कसे बनतात?
– सुलक्षण शेवाळे, नागपूर
वास्तव आणि कविता यात फरक असतोच…
चिमणराव-गुंड्याभाऊ यांना आज पुनर्जन्म द्यायचा झाला तर तुमच्याशिवाय चिमणरावाला पर्याय नाही, हे तर फिक्स- पण मग गुंड्याभाऊ उत्तम कोण साकारेल?
– जान्हवी पळशीकर, दादर
आनंद इंगळे
