कोविड संसर्ग झाल्यामुळे होम क्वारंटाइनमध्ये एकत्र राहिल्याने नवराबायकोंमध्ये प्रेम वाढेल की कमी होईल?
स्नेहा मांजरेकर, कांदिवली
– करोना या चायनीज शब्दाचा भारतीय भाषांमधला समानार्थी शब्द आहे खापर. जे कशावरही फुटते… जे आपण आता पिढ्यानपिढ्या जतन करून ठेवणार आहोत.
महाराष्ट्रात कोरोनाचा जोर वाढतोय, उत्तर प्रदेश, बंगालमध्ये त्याचं नावही कोणी घेत नाही. हे काय गौडबंगाल असेल?
सुमीत क्षीरसागर, देवगड
– आपल्याला कोरोना आलाय. इतरांना आपल्याइतकं थोडंच येतं सगळ्यातलं?
प्यार को प्यार ही रहने दो कोई नाम न दो, असं गुलजार म्हणतात. पणप्यार हेही त्यांनी दिलेलं एक नावच आहे की! त्याचं काय?
मानसी राणे, चेंबूर
– त्यांचं काही तुम्ही मनावर घेऊ नका. तुम्हाला हवं ते देऊन टाका गुपचूप. आणि नाही दिलंत तरी कोण येणार आहे विचारायला?
राजकारणात जो खेळ चालला आहे, तो कधी थांबणार?
मानसी केळुस्कर, कुडाळ
– आता पृथ्वी कधी फिरायची थांबेल हे सांगता आलंय कुणाला आजवर?
पुरातन देवळांचे जीर्णोद्धार करण्याऐवजी आणि नवीन देवळं बांधण्याऐवजी गावात, शहरात अद्ययावत आरोग्य केंद्र उभारणं गरजेचं आहे, हे आतातरी भारतीय जनतेला पटेल का?
शौनक सिंदगी, दादर
– भारतीय जनतेला ते कधीच पटलेलं आहे. नुसत्या जनतेला पटून काय उपयोग आहे?
महाराष्ट्राच्या मंत्रिमंडळात संधी मिळाली तर कोणतं मंत्रीपद घ्यायला आवडेल? आणि देशाच्या मंत्रिमंडळात?
सुरेश पटवर्धन, चेंबूर
– अहो मंत्रिपद मिळालं तर, म्हणायला मंत्रिपद म्हणजे तो काही सत्यनारायणाचा प्रसाद नाही की गेलो समोर की कुणी हातात टाकेल. या सिस्टीममध्ये नेमानं यांनी जगू दिलं तरी खूप आहे. पण स्वप्नरंजनच करायचं झालं तर, ‘हजरजबाबी मंत्री’. जो हजरही राहील आणि कोणताही जबाब द्यायला ब्रम्हदेवाचाही मुलाहिजा ठेवणार नाही.
सगळे धर्म प्रेमाची शिकवण देतात, सगळे संत प्रेमाची महती सांगतात; मग प्रेमिकांवर संस्कृतीरक्षकांचा एवढा राग का असतो?
सुकन्या लेले, नाशिक
– एकतर तुम्ही त्यांना अंधारात ठेऊन प्रेमं करता आणि वर त्यांचं मार्गदर्शनही घेत नाही….
अक्षता म्हणून तांदूळच का वापरले जातात? इतर धान्यं का नाही वापरली जात?
अशोक प. परब, ठाणे
– तोच तांदूळ नंतर गोळा करून रात्री नुसता धुतला तरी शिजवता येतो. जोंधळे, गहू धुऊन तसेच शिजवता येत नाहीत. गहू धुऊन शिजवायला गेलं तर खिरी साठी गूळ पाहिजे. तो रुखवतात दुपारी लंपास झालेला असतो. धुतलेल्या जोंधळ्यांचा काय काय पदार्थ करणार? बरं ते धुऊन दळता येत नाहीत. आणि रात्री गिरणी कोण शोधत बसेल त्यासाठी? त्यापेक्षा तांदूळ सर्वार्थाने परवडतो.
माणूस खोटं का बोलतो?
अक्षय पराडकर, प्रभादेवी
– सत्याची महती टिकावी म्हणून.
तुमच्या नुकत्याच झालेल्या वाढदिवसाबद्दल सर्वप्रथम शुभेच्छा देतो. या वाढदिवसाला काय संकल्प केलात?
राहुल मोरे, चिंचवड
– की कोणताही अघोरी संकल्प यंदा करायचा नाही.
माझे वय ७५ आहे. तरीही मला अजून अक्कलदाढ आलेली नाही. काय करावे?
रामदास मारणे, सोलापूर
– हे लक्षात आहे म्हणजे त्यामानाने स्मरणशक्ती उत्तम आहे तुमची, मग कशाला हवी आता ती? नाहीतरी या वयात ती किडणार, पडणार, नाहीतर ती काढा. वर या वयात वेदनेचा खर्च खूप. आणि तसंही तुमच्या शिवाय ती नाहीये हे आजवर कुणाला कळलं नाही. तरीही किंबहुना त्यामुळेच आजवरची वर्ष उत्तमच काढली असणार तुम्ही. मग आता ती खंत
कशाला बाळगताय?
कोरोनासंसर्ग रोखण्यासाठी सगळ्यात जालीम उपाय कोणता?
सनय तिळवे, घाटकोपर
– तो जाण्याची वाट बघणे.
