आंब्राई

मोहन भागवत

माझ्या सच्चा अंधभक्तांनो
घरोघरी तुम्ही करा प्रचार
दिवसा रात्री एक कार्यक्रम
पोरे होऊं द्या भारंभार

हिंदू राष्ट्राला भरभक्कमता
द्याया मजबूत भव्य आकार
घाला पोरे, जन्मा सत्वर
मुसलमानांचा नको विचार

चायनालाही मागे टाकू
नकोच चिंता भवितव्याची
संघ दक्ष हा मुले पोसवण्या
पालकांना सोय वृद्धाश्रमाची

—– —– —–

एकनाथ शिंदे

कसे भोगले मुख्यमंत्रीपद
होती गर्वाने फुगली छाती
आज मागता पुन्हा परत ते
मम स्वप्नांची झाली माती

अडीचकीत पीडले भाजपला
दिला दाखवून माझा तोरा
पिंजर्‍यात मज ढकलून आता
म्हणती आता नाच रे मोरा

गद्दारीचे नडता फळ हे
सावध झाले शहा-मोदीजी
भीती वाटली त्यांना माझी
करतील आपल्याशीही दगाबाजी

—– —– —–

देवेंद्र फडणवीस

दिवसेंदिवस वाढत होता
आमच्या जीवावर त्यांचा रूबाब
क्षणात आणले आम्ही जमिनीवर
हड्डीसकटही गेला कबाब

ज्यांच्या जीवावर मिळे सीएमपद
त्यांच्यावरतीच उलटून येता
दाखवला हिसका भाजपचा
तेल-तूपही गेले आता

पाहून यांच्या मर्कटचेष्टा
करमणूक झाली जनतेची
असे कसे हे त्यांचे डोके
आठवण येई मज खोक्यांची

—– —– —–

अजित पवार

उपमुख्यमंत्रीपदी झालो राजी
अर्थखात्यावर हक्कच माझा
बालहट्ट तो शिंदे सरांचा
म्हणती मला ते बनवा राजा

सीएम पदाची हाव कशाला
पाय पसरावे अंथरुण पाहून
सद्यस्थितीची अक्कल नसता
पडल्यावर कोणी येईल धावून?

सत्तेची जर चटक लागली
नसता सत्ता मिळती लत्ता
नाही शिकले अजून तरीही
होऊन जातील ते खलबत्ता

—– —– —–

अमित शहा

कोण समजती शिंदे स्वत:ला
कोणावरती धरता नेम
आमच्या जीवावर तुमच्या मौजा
करून टाकीन एकदाच गेम

उपकारांची जाण ना त्यांना
गद्दारीची परंपरा ही
गर्वाचे घर सदैव खाली
आम्ही थारा दिला तरीही

मोडके घर अन पोकळ वासा
फुटेल भ्रमाचा कधीही भोपळा
कळेल तेव्हा चुकले अपुले
आवळा काढून देऊ कोहळा